跟隨我們
.
.
|
|
 |
 |
 |
 |
 |
 |
 |
食好嘢依度冇打手，好食先介紹
2021-03-25
灣仔合和中心<自助山>
同特別既人慶祝特別既日子要有獨特既環境同氣氛。今日食好嘢去左灣仔合和中心既自助山食自助晚餐。依度既景色係全港數一數二正，雖然喺山頂既餐廳都可以睇到依個景，但係依度可以360度旋轉睇晒全景。
依度日間既景都係好靚，所以我地6點半開始入席前已趕到，提早入座先欣賞日間個景，日間個景唔係睇到好耐架咋，好快就天黑，咁我地就日夜景都欣賞晒。
為左要回本，我選擇一口龍蝦配一口鵝肝，咁樣埋單時都覺得安慰些。
另外一個更加正既食法係，一口脆皮乳豬配一口鵝肝，嘩！熱燙既鵝肝混埋乳豬既脆皮同油脂，果種化學作用真係要親身嘗試先能形容。
另一個經常售罄既就係蟹粉小籠包，每人限取2籠，經常排到自己已經比人攞晒。奉勸大家攞左之後將小籠包放係個碗度食，因為塊皮真係薄，我嘗試左三次都整穿左塊皮，啲湯漏晒係個籠下面隻碟度，三次都飲唔到啲湯。
依個鮑參肚係限量供應，攞左一次之後都唔見再有，有水準的。
所有食物由個湯 (冬蔭公湯)，到熱食，到海鮮，煎炸物，雪糕，蛋糕，甜品都水準以上，不欺客。由其甜品方面除左大蛋糕仲有精緻既細件蛋糕，認真唔馬虎，針對上來的多數係情侶，精緻的甜品係滿足女性既需求，餐廳定位正確。
最後連餐飲都比杯特濃咖啡我，可想而知佢地重視細節，難怪星期四都咁滿人,依家香港人寧願比貴啲但係嘢食質素要好。
2019-10-02
屯門蝴蝶商場<明星酒家>
食好嘢今晚去左屯門蝴蝶商場明星酒家食帝皇蟹，4斤幾重一隻，生生猛猛原隻清蒸，啖啖肉鮮甜爽口，緊係正啦！最緊要依家特賣，5折148一斤，成隻上枱都係648元，一家人食都夠，邊度搵呀！
2019-10-01
馬鞍山 We go Mall <Metro Asia>
食好嘢今日去左馬鞍山We Go Mall 既Metro Asia食下午茶。比我發現下午茶竟然有馬來鴨腿湯麵！? 成隻鴨腿比晒你，肉滑，有肉味仲要彈牙，鴨腿來貨要好靚先至有咁既水準。D麵又滑喉，啖湯先至正，一滴都飲晒，鍾意飲肉骨茶既一定鍾意佢既藥材味，師傅話用蒸櫃蒸两日先有咁既效果，下午茶咋喎！咁認真正製作既，仲要賣55蚊咁大工程好以本傷人喎，問左先知原來又係富豪酒店出來開既餐廳，之前已經食過佢地既月光光，都係落足本，難得咁有心製作。
55蚊真係好食到難忘
2019-02-14
<半島酒店Lobby> High Tea 食好嘢
食好嘢今日情人節決定給愛人一個surprise。情人節出去尖咀行街都算係大多數情人會做既事，今日天氣又好喎！有溫暖陽光又唔熱，中午已經出左去行街街，两手空空緊係唔得啦！但係買定啲花帶出去又好鬼唔自然，行行吓唔覺唔覺就帶左愛人去海防道鮮花巿場，唔覺唔覺咁同佢講揀紮喜歡的！見佢心甜甜咁笑左就比左第一個驚喜佢先啦！之後拿住鮮花在陽光和海景下行街，行行吓就唔少得去坐低食吓嘢談吓心架啦！然後又好不經意咁提議話去找間快餐店食下午茶囉…？行行吓去左半島酒店就拖住佢手轉左入去半島玻璃門，大堂服務員問幾位？就輕描淡寫咁話2位唔該，咁樣就比左愛人第二個更大的surprise啦！坐在半島lobby的窗邊，有和煦陽光照在枱面和室內椰葉，在殿堂般既環境吓咁樣和愛人享受英式high tea 最理想不過。點解要high tea唔燭光晚餐？主因係年年都晚餐已經在預期之內了，什麼都預期之內就唔算驚喜啦！
半島既甜點其實都唔需要特別形容點好食，點正，一切都合晒要求，滿意。當然啦，還有些更高級別既半島甜點要在其他場合先可以食到。
英式鬆餅我很滿意，由其係口感，因為鬆餅既texture 要控掣得好好食落先討好，唔會實，唔會乾，唔會黏，唔太甜，先至合我要求。
2018-12-07
將軍澳Popcorn <Simplylife>食好嘢
食好嘢今晚去左將軍澳Popcorn既Simplylife食好嘢，依間餐廳真係交足功課，入去果陣已經見到隔離枱碟牛扒好大件，問清楚原來係晚餐之後照點一份，安格斯肉眼扒10安士$208。上枱後果然夠份量，而且肉厚，你明我意思啦，好多時去食牛扒心裡都會問到底夠唔夠稱架？牛扒好濃肉味，用爐火照成，肉汁不斷流出，各樣配菜質量都交足功課，食完非常滿足。依個價錢其實很滿意了，以往食親安格斯牛扒拿埋都$260，$280，今晚依個價錢同喜出望外既質素算幾好了。
太太點既依個蕃茄汁海鮮意粉我痴左D食，亦都係交足功課。細節除左喺海鮮外，個汁先至睇到細節之處，因為一口食落去即刻覺得自己個口有口水流出嚟，依D就係廚藝。魚皮脆，意粉彈依D已經係必須既，唔須要講。
Simplylife popcorn 可以加$30就有餐湯，麵包連嘢飲。
Simplylife popcorn依個質素同warm既進餐環境，依個價錢算唔話得。
2018-11-13 九龍城<月光光>食好嘢
食好嘢今日去左九龍城月光光食晚飯，經過沙浦道見依間茶餐廳裝修幾靚，就入左去食，諗住隨便食飽就算，點左最簡單既蝦仁炒蛋飯。突然睇到張餐紙係富豪酒店既！？原來酒店走出嚟開埋茶餐廳。
D餸嚟到先知咁大蝶既？D蛋成座山咁大堆，一個人點食得晒呀！依個都唔係重點，D蝦咁大隻既？湯匙咁大隻，依D係擺酒先用既大蝦嚟架喎！蝦肉做到擺酒菜式果種爽彈脆，蛋又滑，都係65蚊，加多10蚊有埋個菜，晚飯依個價錢真係算係咁啦。
2018-11-12 新世紀廣場<文華冰室>食好嘢
食好嘢今晚去左旺角新世紀廣場文華冰室食宵夜，其實去到已經夜，我都無咩特別要求想有D咩特別嘢食，隨便點個豬扒煎蛋飯就算，所以都無打算要介紹乜嘢。
點知食左啖煎蛋咁好食既，食左啖豬扒爆汁既！於是將隻匙羮遮住食過果啖既豬扒，影番張相要介紹番，所以大家可以見到隻蛋右下角會冇左忽。
佢D蛋係煎得好理想！我依個人食蛋要食荷包蛋，真係奄尖既人，又唔想食太陽蛋既生蛋白，但係又唔想蛋白煎得耐，一反就好喇！想要中間蛋白要流漿，中間既蛋黃一D都唔可以煎熟喎！但係蛋白两邊都有少少脆就最好啦！咁我就無話可說！依個要求我自己煎都要做好多次先得，你都要人地個員工肯咁有心機同你整先得架，但係佢就做到。
豬扒食落去竟然會爆汁既！依間咩嘢冰室嚟架？咁有心機既做嘢！豬扒要做到煎完會入口爆汁唔係咁易食到！有好多細節要做架，又乾又嚡既豬扒就見得多食得多！
2018-10-31
屯門新墟仁政街<小巴黎>食好嘢
食好嘢今日去左屯門新墟仁政街既小巴黎食飯，食左香茅豬扒飯非常之抵食又好食！两大塊豬扒都軟滑又有些許肥痴喺條邊度，食落好入味又冧，加埋D蔥油真係好嘢味。食到飽飽都係44蚊，加嘢飲都係加3蚊，仲要晚飯同價喎！
2018-10-19 屯門<明星>食好嘢
今日外母生日，食好嘢同外父外母一共4人去左屯門蝴蝶邨既明星海鮮酒家食晚飯。點左每人一隻蒜蓉蒸波士頓龍蝦。蒜蓉蒸蝦肉好鮮甜，又彈牙。大家都食晒成隻，大大啖食得好滿足！老人家又食得好高興，最緊要都係咁遮！今日閒日每隻龍蝦蒸埋出嚟都係70蚊，4隻都係280，同外母慶祝生日唔失禮之餘都唔傷荷包。
當然啦！去得酒樓食飯預左收茶芥，加一。
2018-10-16
羅湖口岸新都酒店<丹桂軒>食好嘢
食好嘢今日去左羅湖新都酒店丹桂軒飲茶，依間丹桂軒我去左十幾年，咁多年嚟既點心都保持咁好水準，每次上大陸差不多都先上嚟飲完茶再出發。今次一如以往都係食蝦餃，牛肉，淨腸粉，小籠包。平時好少點燒賣，今次點埋燒賣。
蝦餃每次都必食，因為實在令人滿足。蝦餃皮好薄接近透明，最緊要係味道好！佢既汁流出嚟好鮮美，我習慣咬開層皮睇裡面既餡料，裡面既蝦肉有油光既，爽滑！而且蝦味鮮，我經常食夠3粒。
燒賣簡直要比讚，啲豬肉非常好味，爽口流肉汁出來，調味非常令人滿意。今次食完一籠再點多一籠先滿足。
小籠包係太太自細至愛，所以必點給太太食，每次都讓佢食夠3個。數一數佢一個小籠包有成20摺，仲要皮薄，連頂既收皮位都唔厚，功夫好。
佢既肉餡唔會食濟人，肉餡清甜而包汁肉味濃郁，好好飲。
依個淨腸我和太太次次必食，又薄又軟又滑，係最快清碟既！今次追加多碟。
飲完茶埋單先醒起2點半係下午茶時間，點心8折，我哋坐低時14:19，等多10分鐘先落單就全單8折了，可省多30人仔
羅湖口岸新都酒店丹桂軒
2018-10-12
天水圍天盛商場<茜廊>食好嘢
我本身都鍾意食乳豬，所以我更加喜歡依到既燒BB豬，因為佢好滑好嫩同好多肉汁，皮脆係基本嘢，佢唔係得層皮，佢啲肉先至正！啲肉厚過鷄扒，啲肉汁喺咁流，一上枱我就先連食两舊，唔理咁多！啲肉汁同埋肉味真係令人回味又回味。148蚊份連埋餐湯同沙律，我哋6位叫左两份Share，因為我食得多，其他人一定唔夠分。
依隻燒春鷄係呀媽點既，老實講我自己一定唔會點，因為經驗過太多唔好食既春鷄，但係佢老人家點我就唔多意見啦！點知竟然出乎意料之外，皮脆喎！隻鷄由我切開6份，一邊切既時候係流汁出嚟既，我要左鷄肶果件嚟食，真係好唔錯喇！皮脆肉滑腌得又入味，68蚊咋！包埋湯同沙律。
今晚點左3份鵝肝，我鍾意煎得香脆既鵝肝，味道合我心意，而且算好大塊鵝肝，24蚊件出面食鵝肝壽司丁咁細件都唔止依個價。
今晚嚟到門口先知買4個套餐最平果1個免費，咁我哋就平左個88蚊既蝦球闊條麵。
2018-10-10 荃灣路德圍<魚魚魚>食好嘢
食好嘢今晚去到荃灣路德圍既<魚魚魚>食宵夜，依間店其實我幫襯左好多年，鍾意佢既魚湯夠正！每次我想飲靚湯既時候就算遠我都會坐車來依度食，今晚點左原條黃立鯧湯飯，再加木瓜同雜菇。佢本身既湯底已經係用魚煲，再加上我果條黃立鯧一齊煲，咁就魚又鮮甜，湯又鮮上加鮮！碗湯出嚟全乳白色，未飲就知甜。我一向都鍾意幫襯用心泡製，真材實料既餐廳，所以依間店先搏得我多年光顧。
原條黃立鯧湯飯，飯另上可以有多啲湯飲65，再另加木瓜同雜菇
2018-10-09
屯門蝴蝶邨熟食亭 <牛皇莫>食好嘢
食好嘢今日去左屯門蝴蝶邨冬菇亭既牛皇莫食晏。叫左個肥牛腩米，牛腩非常之正！牛腩有少少肥，肉好軟滑又彈牙，始終係鮮牛腩先有咁既口感，而且牛腩既味道令人回味，以後想再食。
我太太就點左鮮蕃茄豬潤牛肉湯飯，依個係老婆至愛，由其係佢無咩胃口既時候。我最鍾意痴飲佢既湯，第一蕃茄味幾重，又有豬潤既湯底，加左D薑絲去煲，飲完覺得好舒服。
Copyright 2015, Zeapier Enterprise Limited
